O veciño da Baña, na Coruña, Pedro Raño Espasandín, que levaba en prisión desde o 28 de novembro do 2014 tras ser condenado por violar e maltratar durante 12 anos ás súas tres fillastras, saíu o xoves da prisión coruñesa de Teixeiro ao ser absolto polo Tribunal Supremo.
Así, o fallo do Alto Tribunal revoga a condena que lle impuxo a Audiencia Provincial da Coruña, que o condenou a 44 anos de prisión, como autor de tres delitos continuados contra a liberdade sexual por violar á súa muller, ás súas tres fillastras e á súa filla. No xuízo que se celebrou os días 6, 7 e 8 de setembro de 2016 considerouse probado que este veciño da Baña de 47 anos estivera abusando durante máis dunha década das tres fillas da súa esposa.
"Aínda que desde o principio foi acusado de maltratar e abusar tamén da súa muller e da única filla en común, por entón de tres anos, foi absolto no xuízo destes execrables delitos, ao non haber probas, pero o tribunal coruñés decidiu condenalo por violación e malos tratos aos seus 3 fillastras, a pesar da ausencia de indicios probatorios", segundo sostén o seu defensa.
A causa, que no seu momento creo alarma social e que convocou a manifestarse a varias asociacións como Stop Desafiuzamentos e outras en defensa das mulleres maltratadas na porta da Audiencia Provincial da Coruña durante a celebración do xuízo, "quedou pechada coa completa absolución de todos os cargos que se lle imputaban", segundo resalta a defensa deste home, tras a decisión do Tribunal Supremo. En concreto, no auto de posta en liberdade con data de 16 de marzo, recollido por Europa Press, sinálase que "se estimou o recurso de casación decretando a libre absolución do procesado polos tres delitos continuados contra a liberdade sexual polos que viña condenado".
"Procede deixar así mesmo sen efecto as penas de prohibición de aproximación e de comunicación acordada na sentenza", segundo concreta a Audiencia Provincial
Por iso, a Audiencia Provincial da Coruña indica no auto de posta en liberdade, que "debe cesar a situación de prisión provisional acordada polo Xulgado de Instrución Número 1 de Negreira o 28 de novembro de 2014" e prorrogada por auto da Sección 10 de outubro de 2016. "Procede deixar así mesmo sen efecto as penas de prohibición de aproximación e de comunicación acordada na sentenza", segundo concreta a Audiencia Provincial da Coruña.
AUSENCIA DE PROBAS. O avogado defensor Kostka Fernández, do despacho KNM Avogados, recordou que defendeu desde o inicio "a ausencia de probas e que se estaba cometendo unha gran inxustiza, dando credibilidade a unhas simples declaracións, fronte a unha abafadora cantidade de probas que demostraban a inocencia de quen levaba en prisión dous anos". "Non foi fácil loitar contra todo e contra todos, pero o convencemento de que se estaba vulnerando a presunción de inocencia e de que se estaba cometendo unha gran inxustiza, animou ao despacho a defender a quen considerabamos inocente", manifestou o letrado coruñés.
Este xoves Pedro Raño puido abandonar a prisión
Kostka Fernández sinala recorda que foi a propia sala da Audiencia Provincial a que admitía na súa sentenza de outubro do ano pasado "a ausencia de probas concluíntes", e sostiña na resolución condenatoria que estaban "ante unha ponderación de credibilidades, na que a sala, sen ignorar a boa opinión que del tiñan un bo número de persoas, opta pola versión dada polas tres fillas da esposa do procesado", argumento que, segundo o defensor, "de forma taxativa tumba o Tribunal Supremo, tras a presentación do recurso de casación".
Kostka Fernández durante o xuízo puxo de manifesto que a exesposa xa denunciara ao seu primeiro marido por feitos similares e que, finalmente, demostrouse que "todo fora unha mentira e unha denuncia falsa, como agora", segundo concreta o letrado. Deste xeito, o letrado subliñou que "sempre insistiu en que se estaba facendo un uso perverso da moi necesaria Lei de Violencia de Xénero e lamentou o dano que fai ás mulleres maltratadas cando se presenta unha denuncia falsa".
A sentenza condenatoria foi recorrida en casación ao Tribunal Supremo e o xoves día 16 emitiuse un auto no que ordenaba a súa inmediata saída de prisión. De feito, o Tribunal Supremo reuniuse pola mañá e á tarde Pedro Raño puido abandonar a prisión e acudir á Coruña a cear co seu avogado.
