A okupación de vivendas crece e profesionalízase na comunidade. O Colexio de Administradores de Fincas de Galicia lanza a alerta ante o aumento deste fenómeno no verán e explica ata que punto se recorre a el para ter un teito baixo o que vivir en caso de necesidade e incluso para obter un beneficio económico. E é que existen os denominados chamadores de okupas, mafias que buscan vivendas para que outros as habiten de xeito forzoso a cambio de diñeiro, e os subarrendatarios dos okupas que, coñecedores ou non da situación, páganlles unha renda e incluso teñen un contrato de aluguer.
Os administradores alertan doutra práctica crecente: os inquilinos morosos que, tras ser desafiuzados polo impago da renda ao caseiro, "volven aos pisos e convértense en okupas".
Fontes colexiais achacan a proliferación deste fenómeno á "impunidade existente" e ao efecto chamada que ven no decreto lei que impide desaloxar okupas se as violacións non se producen con violencia. "Se as penas fosen máis duras non se okuparían tantas vivendas", sostén a vicepresidenta da corporación, Carmela Lavandeira, quen recorda que para xerar vivenda en aluguer "nun mercado que a demanda cada vez máis necesítanse medidas que xeren confianza no arrendador". En cambio, a preocupación entre os propietarios con pisos baleiros é "crecente" polo aumento de okupacións.
¿COMO ACTUAR? Se detecta ou ten sospeitas de que nalgunha vivenda do seu edificio ou da contorna metéronse descoñecidos, os administradores de fincas recomendan non facer nada por conta propia e moito menos enfrontarse aos okupas. O consello é chamar aos propietarios da casa e á Policía Nacional para que procedan ao desaloxo.
Como medidas preventivas, en vivendas e locais baleiros receitan colocar portas blindadas ou de alta seguridade, tapiar zonas "vulnerables" e instalar enreixados e alarmas. Se se tarda en volver a casa, recomendan planificar limpezas periódicas de fiestras e retirar o correo acumulado. Avogan, ademais, por instalar dispositivos para programar o acendido de luces a determinadas horas e recordan que non se deben deixar persianas baixadas durante moito tempo nin colocar carteis que indiquen que a propiedade está baleira.
