Un octoxenario desaparecido en Chantada foi localizado este martes con síntomas de hipotermia tras pasar a noite perdido.
O home foi localizado na mañá deste martes en Santa Uxía de Asma, preto do seu domicilio, despois de que efectivos da Garda Civil e voluntarios de protección civil estivesen a buscalo durante toda a noite.
Segundo informou o 112 Galicia, a desaparición notificouse á central de urxencias ao redor da media noite deste luns. Ao parecer, o home saíra a andar e a súa familia non sabía nada del desde as 16.00 horas.
Ata o lugar onde foi localizado desprazáronse efectivos do 961, que trasladaron ao home a un centro hospitalario.