Os mariñeiros da asociación Long Hope que traballaron en Noruega manifestáronse este venres en Santiago de Compostela para reclamar ao Goberno español que os apoie na súa cruzada para recuperar as pensións correspondentes aos seus anos de traballo no país nórdico.
"Non entendemos as razóns do Goberno para dicir que non se pode interpor unha demanda interestatal contra Noruega", dixo o seu portavoz, Alberto Paz, quen engadiu que, "como parte do pobo", teñen dereito a coñecer cal é o motivo político detrás de tal decisión.
"É impresentable, deleznable e asqueroso que o Goberno español non saque peito por nós", declarou Paz aos medios.
Tras varias reunións mantidas nas últimas datas, a asociación asegura que "todos os organismos" coinciden en que "Noruega cometeu unha inxustiza social" na súa contra e que por iso non entenden por que a Administración española non asume o labor de "clarificala" e defendelos.
Long Hope presentará unha demanda colectiva contra Noruega, que deberá esgotar as canles xudiciais dese país ata chegar ao Tribunal Europeo de Dereitos Humanos de Estrasburgo.
Ademais, o portavoz Alberto Paz afirmou que o Goberno prometeu que se acudirá como Estado" para defender a Long Hope se o caso chega a Estrasburgo, algo que non ve "suficiente" e que considera que persegue un rédito político.
"Trátannos como bobos", declarou, pero "sabemos o que é a vida", dixo.
De momento, Paz confirmou que se van a seguir manifestando ata que se solucione o problema, e que organizarán tres concentracións e unha manifestación todos os meses.
O conflito coas pensións afecta a ao redor de 12.000 mariñeiros españois, dos cales se estima que 8.000 son galegos.
A débeda total estimada ascende a unha cantidade próxima aos 520 millóns de euros en concepto de pensións non percibidas.
