Os pacientes oncolóxicos do hospital de día do CHUS (Complexo Hospitalario Universitario de Santiago) denuncian as "condicións materiais intolerables" que sofren cando acoden a este centro sanitario a recibir tratamento.
A Asociación de Pacientes e Usuarios do CHUS indica nun comunicado que presentará queixa ante a valedora do pobo e solicitarán o seu amparo "co obxecto de que se cumpran as recomendacións do Ministerio de Sanidade e se melloren as condicións materiais do servizo". Explican que a decisión de acudir á valedora do pobo a adoptan despois de que o pasado mes de abril devandita asociación xa denunciase ante a Xerencia do CHUS "as lamentables condicións que soportamos no hospital de día para poder recibir o noso tratamento".
"Logo de varios meses daquela denuncia, a Xerencia nin tan sequera tivo a dignidade de contestarnos, limitándose a facer unha declaración pública na que manifestaban que se ían a pór en marcha as obras de ampliación e mellora do hospital e separar oncoloxía de hematoloxía". "O certo -engaden- é que nada do declarado se cumpriu", e explican que "as esperas ata o momento do tratamento seguen sendo interminables e en moitas ocasións son as dúas da tarde e aínda non o iniciamos".
Así mesmo, quéixanse de que as condicións materiais "non cambiaron e seguen sen cumprir as recomendacións publicadas polo Ministerio de Sanidade desde o ano 2009".
Neste sentido, indica a asociación no comunicado que as salas de espera "seguen sendo cada vez máis insuficientes, os asentos dispoñibles son escasos e non cumpren os requisitos de confortabilidade nin dispoñen de fontes de auga fría".
Tamén explican que a zona de admisión "non conta cun espazo de atención que garanta un certo grao de privacidade, a área de tratamento, sen luz directa ao exterior, non garante o noso dereito á intimidade e só contamos cunha leve cortina que nos separa do resto dos pacientes da sala". En canto ao servizo de farmacia, sinalan que "as demoras para recibir a medicación pode prolongarse ata dúas horas".
Os pacientes oncolóxicos do CHUS denuncian "condicións intolerables"
Presentarán unha queixa ante a valedora do pobo polo incumprimento dos requisitos de confortabilidade e privacidade