O delegado do Goberno en Galicia, Javier Losada, destacou que os Orzamentos Xerais do Estado (PGE) para este ano previstos para a Comunidade galega son "realistas", nos que se recollen "investimentos para executar e para seguir avanzando".
Nun comunicado, argumenta que "fronte ás contas aprobadas en anteriores exercicios polo Goberno do PP, onde se inflaban cifras que non se facían realidade, para este ano garántense aqueles investimentos que levarán a cabo, cun investimento global de 757,1 millóns de euros".
"Este é un Goberno que di a verdade, que di o que fai e fai o que di", sostén Losada. Fronte a iso, afirma que, en anos anteriores, "orzábase moi por encima do que se chegaba a executar".
Así, puxo como exemplo o ano 2016, "un dos que rexistrou un dos anuncios investidores máis altos dos últimos exercicios con 1.363 millóns dos que apenas se executaron 552 millóns, o que representa o 41% do total orzado", apunta sobre as contas do PP.
E é que, para Losada, "o executado nos últimos anos está moi por baixo dos orzamentos previsto polo Goberno para 2019". "E co obxectivo de presentar unhas contas realistas que si se executen", sinala sobre a política do goberno de Pedro Sánchez en materia económica.
"COMPROMISO SOCIAL"
Por outra banda, o delegado do Goberno apela ao "forte compromiso social" destes orzamentos, coa "recuperación de dereitos e a mellora das políticas de benestar, que son as que chegan directamente á cidadanía".
En concreto, cita as pensións, as bolsas, a sanidade, o salario mínimo, a dependencia, "e outros que repercutirán positivamente na calidade de vida de galegos e galegos durante este ano".
