Louzán comparecerá en Cambados este luns investigado por suborno

O xuíz imputou ao expresidente da Deputación por, presuntamente, realizar un sobrecobro nos alugueres duns baixos da súa propiedade
Rafael Louzán
photo_camera Rafael Louzán

O maxistrado do xulgado de instrución número dous de Cambados citou a declarar o vindeiro luns en calidade de investigado ao expresidente da Deputación de Pontevedra Rafael Louzán en relación a un suposto delito de suborno por sobrecobro nos alugueres duns baixos da súa propiedade. Así o comunicaron este venres fontes do Tribunal Superior de Xustiza de Galicia (TSXG), que concretaron que o xuíz acordou a citación para as 16.00 horas do luns, día 22, despois de que solicitase ser chamado a declarar o propio Louzán, quen tamén é investigado no marco da operación Patos.

Na causa de Cambados mantéñense como investigados -anteriormente imputados- ademais do expresidente provincial, a súa esposa e o deputado provincial do PP e concelleiro de Pazos de Borbén, Severino Reguera, todos eles por un delito de suborno por posibles sobreprezos no aluguer duns baixos na rúa das Teixugueiras, no barrio vigués de Navia. O TSXG confirmou no seu día que a querela da Fiscalía contra Rafael Louzán e a súa esposa, María Teresa C.F., é por suborno continuado, mentres que no caso de Severino Reguera, quen tamén é empresario que conta con varios despachos de panadería e pastelería en distintas localidades de Pontevedra, é por suborno impropio continuado.

En marzo do pasado ano, os tres foron citados para comparecer ante o xuíz que instrúe o caso, aínda que se acolleron ao dereito a non declarar. Naquel momento, tanto a Fiscalía como os avogados defensores expuxeron os seus respectivos argumentos, tras o que o maxistrado acordou continuar o procedemento pola Lei do Xurado, ao tempo que solicitou nova documentación.

Esta mesma semana, Severino Reguera prestou declaración ante o xuíz e despois ante os medios vinculou o ser denunciado por suborno a que "o propietario dos locais era o presidente da Deputación". Así, afirmou que a operación de aluguer é legal e non responde máis que ao interese do arrendador e da empresa arrendataria e defendeu que non hai detrás ningún tipo de favores.

Comentarios