A Garda Civil e a Policía Nacional realizaron 165 propostas de sanción en Galicia este mércores, o primeiro día no que as restricións da Xunta permiten as visitas familiares como motivo de desprazamento, segundo informou a Delegación do Goberno en Galicia.
Os controis realizados alcanzaron a 3.959 persoas e 3.008 vehículos, sendo localizadas 165 infraccións, polo que a mesma fonte destaca que "continúa o maioritario cumprimento da normativa".
En total, a Garda Civil e a Policía Nacional realizaron 423 controis na xornada do mércores. Houbo 48 propostas de sanción da Policía, que identificou a 1.376 persoas e controlou 933 vehículos, e 117 da Garda Civil, con 2.588 persoas identificadas e 2.075 vehículos controlados.
Por outra banda, o delegado do Goberno en Galicia, Javier Losada, coordinou este xoves coa Garda Civil e a Policía Nacional o dispositivo de seguridade para a chegada e distribución das vacinas de covid-19.
Fíxoo nun encontro cos mandos policiais mentres mantén diálogo constante cos ministerios de Sanidade e Interior, responsables da chegada dos envíos.
