A morte dunha muller de 94 anos eleva a 785 as vítimas do covid en Galicia

A anciá fora trasladada ao Chuo desde a residencia Os Gozos de Pereiro de Aguiar
Complejo Hospitalario Universitario de Ourense (Chuo). EP
photo_camera Complexo Hospitalario Universitario de Ourense (CHUO). EP

A pandemia de coronavirus segue custando vidas en Galicia. Os últimos datos do Sergas sitúan en 785 as mortes de persoas afectadas polo covid, tras sumar este domingo a dunha muller de 94 anos que estaba ingresada no Complexo Hospitalario Universitario de Ourense (Chuo).

A nonaxenaria procedía da residencia Os Gozos, en Pereiro de Aguiar e tiña patoloxías previas. O centro acaba de ser intervido pola Xunta e acumula máis de 150 anciáns e 29 traballadores contaxiados. 

Os datos ofrecidos pola Consellería de Sanidade na mañá deste domingo, unhas horas antes de informar desta nova morte, xa reflectían catro falecementos máis que na xornada anterior. Son os de dous homes de 59 e 74 anos e unha muller de 83 que estaban ingresados no Complexo Hospitalario Universitario da Coruña (Chuac), ademais doutra muller de 88 no Complexo Hospitalario Universitario de Santiago (CHUS). 

Cos cinco falecementos notificados este domingo, a cifra de vítimas desde o comezo da chamada nova normalidade ascende a 164 en Galicia. A primeira morte deste período foi a dunha muller o 7 de agosto. Antes diso, a comunidade encadeara case dous meses —desde o 10 de xuño— sen decesos relacionados co coronavirus. 

Comentarios