Un home faleceu este luns tras caer ao mar desde unhas rocas próximas á praia da Arnela, en Fisterra. O home, de 65 anos, foi rescatado polo helicóptero Pesca 1, pero faleceu posteriormente.
Segundo informou o 112, foi un familiar da vítima quen avisou ao servizo de urxencias ás 19.00 horas deste luns de que unha persoa caera, sufrira un golpe na cabeza e non conseguía saír da auga.
Por iso, os xestores da central de urxencias puxeron os feitos en coñecemento dos servizos sanitarios, da Garda Civil, de Salvamento Marítimo, do Servizo de Gardacostas de Galicia e de Protección Civil de Fisterra.
Salvamento mobilizou dúas embarcacións ata o lugar, ademais do helicóptero Pesca 1 da Xunta, que rescatou o home para trasladalo ao Hospital Virxe da Xunqueira de Cee, onde, segundo confirmou Salvamento Marítimo, faleceu.