Norvento centra a súa estratexia de expansión na xeración distribuída para a industria

Norvento focalizará a súa estratexia de expansión no mercado de enerxías renovables no desenvolvemento dunha carteira existente de 597 megawatts (MW) e na expansión internacional con xeración distribuída para a industria, informou a compañía.

En concreto, a compañía, de capital 100% español e con sede en Galicia, conta na actualidade con 110 MW en operación e un pipeline de 597 MW en diferentes fases de desenvolvemento. O grupo está presente en cinco mercados internacionais como Reino Unido, Brasil, Estados Unidos, Polonia e Italia, ademais de España. Proximamente, iniciará operacións en Italia, Africa, Centro América e Caribe.

O director de Enerxía de Norvento, Iván Nogueiras, afirmou que o crecemento e expansión da compañía virán dados tanto polo seu negocio tradicional, baseado en xeración centralizada de enerxía (parques eólicos fundamentalmente) como polo negocio da xeración distribuída (autoconsumo industrial). 

Desta carteira de proxectos de 597 MW, un total de 369 MW estarán en España, a gran maioría en eólica, e os 228 MW restantes en mercados internacionais como Reino Unido, Brasil e Polonia. Actualmente, o grupo ten plenamente operativos 110 MW en España (94 MW eólicos e 16 MW repartidos entre hidráulica, biomasa e solar fotovoltaica).  A previsión da compañía é vender 500 aeroxeradores a Reino Unido durante os próximos dez anos.

A actividade do grupo abarca desde a fabricación de aeroxeradores ata o deseño, promoción, construción e explotación de instalacións de enerxías renovables, parques eólicos fundamentalmente, así como o deseño e construción de instalacións de xeración distribuída e microrredes para autoconsumo industrial e empresarial, así como servizos de enxeñería a terceiros.

Con respecto á fábrica de Norvento en Vilalba, a compañía asegura que polo momento ten capacidade suficiente. En caso de ser necesaria máis, a firma estudaría ampliar as instalacións.