O presidente da Xunta de Galicia, Alberto Núñez Feijóo, repetirá maioría absoluta aínda que axustada nas eleccións autonómicas do 5 de abril con 38/39 escanos, menos que os 41 conseguidos en setembro de 2016, segundo unha enquisa publicada este domingo polo xornal La Razón.
Cun 45,1 % dos votos, o candidato do PP revalidaría a súa hexemonía, mentres que o PSdeG recuperaría o seu liderado na oposición con 20/21 escanos –6/7 máis que nos anteriores comicios– e o 28,4 % dos sufraxios.
O BNG, pola súa banda, aumentaría en 5 escanos a súa presenza no Parlamento galego, pasando de 6 a 11 deputados co 15 % dos votos. Desta forma, o nacionalismo galego recuperaría case 95.000 votos.
Para rematar, a coalición ruptirista, co 7,1 % dos votos, deixaríase 9 escanos e contaría en Santiago de Compostela logo das eleccións con 5 deputados.
Nin Vox nin Ciudadanos entrarían no Parlamento galego. Ambas as formacións, segundo a enquisa, obterían 80.000 votos.
Na súa estrea nunhas autonómicas galegas, o partido de Santiago Abascal conseguiría 65.000 votos, 40.000 dos cales procederían de votantes do PP.
A enquisa fíxose entre o 17 e o 21 de febreiro pasados a 1.000 persoas, e ten unha marxe de erro do 3,3 % e un nivel de confianza do 95,5 %.
