O logo e nome de Podemos estarán nas papeletas de Galicia das xerais

O líder de Podemos, Pablo Iglesias, asegurou este venres que o logo e o nome da súa formación estarán na papeleta e na denominación da coalición coa que concorran en Galicia, onde se dá por feito unha alianza con Anova e EU.

Iglesias referiuse á situación en Galicia en declaracións aos xornalistas tras reunirse con representantes de ONG na sede de Podemos en Madrid.

"En Galicia, o logo e o nome de Podemos estará no nome e na papeleta tamén", afirmou ao ser preguntado de se están dispostos a renunciar á súa marca na coalición que establezan.

Sobre se haberá ou non consulta para designar aos candidatos, Iglesias recordou que a súa formación xa fixo primarias e pediu ao resto de socios que fagan o mesmo.

"Podemos sempre fai primarias e todos os candidatos de Podemos pasaron por primarias abertas á cidadanía. Estamos convencidos de que o resto de socios cos que compartimos ese camiño farán o mesmo que nós", apuntou Iglesias sen dar máis detalles.