O tren accidentado hai un mes no Porriño será retirado este luns pola noite da estación, onde permanece desde o sinistro no que perderon a vida catro persoas e outras 49 resultaron feridas. O traslado da cabeceira do convoi —a máquina que sufriu os maiores danos— ao polígono da Granxa está previsto para as 23.30 horas, segundo informaron fontes da Policía Local. Os outros dous vagóns serán trasladados aos talleres de Renfe en Redondela.
O xulgado de instrución número 2 do Porriño autorizou a operativa a pasada semana nunha providencia na que tamén pedía a Adif e a Renfe información das causas que motivaron os traballos de mantemento na vía e o desvío do tren sinistrado. A xuíza solicita as conversacións rexistradas no posto de mando de Ourense, itinerarios e diversos rexistros.
Así mesmo, pide que se identifique, para a súa posterior toma de declaración, ao operador do posto de mando, persoal de mantemento das instalacións de infraestrutura e ao responsable titor do maquinista, falecido xunto co interventor, un maquinista en prácticas e un turista estadounidense.
O tren Celta, que realizaba o traxecto Vigo-O Porto, descarrilou o 9 de setembro nas inmediacións da estación do Porriño a unha velocidade de 118 quilómetros por hora nunha vía desviada limitada a 30.
A cabeceira do tren accidentado no Porriño será retirada este luns
Renfe trasladará a cabeceira do convoi ao polígono da Granxa e os outros dous vagóns aos seus talleres en Redondela