O director xeral de Centros e Recursos Humanos, Jesús Álvarez Bértolo, presentou este venres as oferta de prazas das oposicións de Educación para 2022, un total de 2.628, nas que destacan 950 de mestres, 1.171 para ensino secundario, 45 para as escolas de idiomas e 8 para as de artes plásticas e deseño.
Ademais, haberá 144 prazas previstas para especialidades do extinto corpo de profesores técnicos de FP, que terán unha convocatoria separada unha vez entre en vigor a lei de FP.
A Xunta recorda que o detalle destas prazas deberá esperar " concreción que resulte da publicación da lei de FP por parte do Goberno central", tanto no referido ás especialidades que pasarán ao corpo de profesores de ensino secundario como no que respecta ao desenvolvemento do corpo de especialistas de sectores singulares da FP.
En calquera caso, estas prazas quedarán aprobadas na oferta pública de emprego de educación da Xunta de 2022, para así poder convocalas en canto sexa posible.
Así llo comunicou o responsable de Recursos Humanos ás centrais sindicais ás que lles detallou que as 2.628 prazas, estarán distribuídas en 61 especialidades, das que máis do 87 por cento corresponden a novo ingreso mentres que os restantes son de promoción interna.
No caso da promoción interna, haberá 10 prazas para o acceso ao corpo de inspectores de educación, 298 para acceder ao corpo de profesores de ensino secundario e as outras 2 para o de artes plásticas e deseño.
A convocatoria destas prazas, que acumulan as ofertas de emprego de 2021 -xa aprobada- e 2022 -que se aprobará no próximo Consello da Xunta-, publicarase antes de que finalice o mes no Diario Oficial de Galicia.
O Goberno galego sinalou tamén que as probas para estas prazas celebraranse nos meses de xuño e xullo polo procedemento habitual co obxectivo de dar "tranquilidade aos opositores" e blindar "a seguridade xurídica do proceso".
A Xunta remarca que "dado que o novo real decreto" orientado a facer cambios no sistema de oposicións para favorecer que os interinos consigan praza "está sen publicar", o Executivo galego decidiu adiantar o proceso para ofrecer certezas ás persoas que están a preparar as probas.
"Deste xeito, Galicia convértese na primeira comunidade autónoma en pechar e aclarar o sistema de oposicións para este ano, ademais de ser a que ten unha interinidade docente máis baixa do Estado, un 8%, fronte ao 25% de media de España", resume a Xunta nun comunicado.
