O subdelegado do Goberno en Pontevedra, Antonio Coello, confirmou que o pase a disposición xudicial dos once detidos por supostas extorsións a ambulantes producirase mañá e que se organizará un dispositivo de seguridade nas inmediacións dos xulgados de Cangas.
Coello avanzou, en declaracións en Vigo, que o dispositivo irá en consonancia co que as forzas policiais consideren "conveniente para salvagardar os bens e a seguridade cidadá".
Ata o seu pase a disposición xudicial, os detidos, oito membros da familia dos morones e tres achegados, permanecen repartidos en dependencias da Garda Civil e da Policía Nacional en Pontevedra e Vigo.
O subdelegado en Pontevedra detallou que os delitos que se lles imputan son sete e non cinco como informou inicialmente a Garda Civil: organización criminal, extorsión, coaccións, fraude á Seguridade Social, tráfico de drogas, tenencia ilícita de armas e branqueo de capitais.
Nos rexistros practicados en catro domicilios de Amorín, en Tomiño, en dúas xestorías en Vigo e nun domicilio en Vilagarcía foron intervidas varias armas, ademais de sete vehículos de alta gama, unha caixa forte e diversa documentación relacionada coa suposta extorsión a ambulantes.
Coello insistiu en que a operación Vida, como así foi bautizada, segue aberta e non se descartan máis detencións.
Encomiou o labor das forzas e corpos de seguridade e do fiscal xefe de Pontevedra, Juan Carlos Aladro, quen viñeron traballando nunha comisión creada tras o aumento das liortas entre os clans dos morones e os zamoranos.
Uns enfrontamentos que, apuntou Coello, "culminaron de forma alarmante nun tiroteo" no que resultou ferido un ambulante do clan dos zamoranos.
Recordou que entón advertiu de que "a impunidade non se podía permitir e o estado de dereito ía prevalecer, e hoxe vemos os resultados", pechou.
