O home acusado de dar morte no municipio coruñés de Oza-Cesuras ao seu fillo de 11 anos valéndose para iso dunha pa metálica enviaba supostamente mensaxes de contido ameazante á parella actual da muller e nai do menor e ao irmán desta. Un deles rezaba: "Todo nesta vida ten un final".
É o que se contou na segunda sesión do xuízo por este crime cometido en 2017, coincidindo co Día da Nai, nunha xornada na que ambos ofreceron o seu testemuño, un día despois de que o único acusado confesase que é imposible que cometese tal atrocidade en estado consciente e alegase os problemas psíquicos que padece.
A parella da muller, que este luns prestou declaración tras un biombo e nunca creu que o seu ex lle arrebataría ao neno de tal modo, comentou que ela nunca saía soa, desde a separación de ambos en 2009, e que tiña medo, pero de que a matase a ela, e nunca ao pequeno.
De feito, este home indicou que destas mensaxes de Marcos Mirás, o presunto autor dos feitos, deuse parte, pero se produciu un sobresemento, e por mor diso a familia non tivo unha confianza plena na Xustiza. E non cesaron os insultos nas redes sociais.
Ao parecer, a relación entre o pai e o fillo era boa, pero nunha ocasión o neno agarrou do pescozo á nai e, cando ela o avisou de que se afogaba, el contestou que era o seu pai o que o instigaba a proceder de tal modo. Ela, asustada polas actitudes do seu ex, chegou nun momento determinado incluso a cambiar de posto de traballo.
A Audiencia Provincial da Coruña acolle ata o vindeiro xoves a vista polo asasinato deste cativo, cualificación en concurso cun delito de lesións psíquicas.
O Ministerio Público solicita a prisión permanente revisable ao entender que a única finalidade do presunto parricida era a de causar dano á súa muller -nai do pequeno- por non aceptar renovar a relación sentimental con el.
Segundo a Fiscalía, ideou un plan e executouno fríamente, sen importarlle a vida do seu fillo e facendo o posible para que o neno non puidese ser socorrido.
