O oncólogo Luis Paz-Ares Rodríguez recolleu este martes no Hostal dos Reis Católicos de Santiago o sexto Premio Internacional de Investigación Oncolóxica, Científica e Técnica Ramiro Carregal. No seu discurso de agradecemento, o galardoado, xefe do servizo de Oncoloxía Médica no Hospital Universitario 12 de Outubro, recordou que o cancro é "un importante problema de saúde pública en todo o mundo" cuxo maior reto está en poder trasladar a cada paciente os coñecementos e tecnoloxías dispoñibles e ir cara a unha atención personalizada.
O doutor, especialista en cancro de pulmón, explicou que este tumor "segue sendo a principal causa de incidencia e mortalidade por cancro en todo o mundo" a pesar dos avances rexistrados en oncoloxía de precisión e en novas tecnoloxías, que permitiron "coñecer o perfil molecular dos tumores e a identificación de novas dianas para o desenvolvemento de fármacos, o descubrimento de marcadores capaces de predicir que pacientes van responder a unha determinada terapia, e a creación de equipos multidisciplinares para a programación e execución diagnóstica e terapéutica". Paz-Ares explicou que na actualidade coñécese "un número relevante de dianas terapéuticas en cancro de pulmón" e disponse de "medicamentos eficaces".
A maior dificultade radica en ofrecer "a cada paciente diagnosticado o acceso, en condicións de equidade, a unha análise de fármaco-diagnóstico con adecuados controis de calidade que permita guiar oportunamente o plan terapéutico". Unha cuestión con máis dificultades organizativas que económicas, segundo o especialista, e que marcará a futura abordaxe desta enfermidade, que aínda ten pendente un longo camiño.
Pola súa banda, o empresario Ramiro Carregal mostrouse agradecido por poder pór o seu "granito de area" na loita contra unha enfermidade que sufriu en carne propia e na de familiares moi próximos. Así, recordou ao premiado deste ano, co que comparte orixe, "a marabillosa terra de Arousa, concretamente Vilagarcía", onde naceu e conserva "bos amigos e mellores recordos".
"As políticas son estériles sen xente como o premiado"
O doutor Paz-Ares di que o reto no cancro é ir cara á atención personalizada
O doutor galego recibiu en Santiago o premio de oncoloxía Ramiro Carregal polo seu labor no tratamento dos diferentes tumores de pulmón, con importantes avances nos últimos anos