Máis de 30.000 usuarios apuntáronse á segunda compra colectiva de carburante promovida pola Organización de Consumidores e Usuarios (Ocu), cuxo prazo de inscrición finaliza o próximo 19 de xuño. As provincias con maior número de rexistrados foron, ata agora, Madrid, Pontevedra, A Coruña e Biscaia. As que presentan un menor número de inscricións son Teruel, Cuenca e Soria.
O obxectivo da iniciativa é o aforro no prezo dos carburantes. A inscrición é gratuíta e, unha vez finalizado o prazo, a organización dará a coñecer os gañadores e o aforro individual conseguido, segundo os datos achegados por cada usuario.
Segundo as estimacións da Ocu, o 42,8% dos inscritos realiza un uso do vehículo de entre 5.000 e 15.000 quilómetros ao ano, o cal implica encher entre unha e dúas veces ao mes. Os datos solicitados indican que o 14,4% dos usuarios enche máis de tres veces ao mes, pois percorre máis de 25.000 quilómetros anuais, mentres que o 8,6% enche menos dunha vez ao mes e conduce menos de 5.000 quilómetros ao ano.
Por outra banda, o 69,5% declarou que utiliza combustible diésel, fronte ao 28% que emprega gasolina. Só o 0,08% dos usuarios inscritos consome biodiésel. Ademais, a maioría prefire facer uso das gasolineiras de Cepsa e Repsol, seguidas das de BP e Galp, segundo Ocu.
Durante a primeira edición de compra colectiva de carburante organizada pola Ocu en maio do ano pasado, os participantes conseguiron un aforro medio en combustible de 75 euros anuais, segundo os datos que facilitaron á organización.
Pontevedra e A Coruña, entre as provincias con máis inscritos na compra colectiva de carburante
Madrid e Biscaia acompañan ás dúas capitais galegas como líderes no seguimento desta iniciativa para aforrar no prezo do combustible
