A líder do BNG, Ana Pontón, apelou este sábado á "herdanza" do intelectual Alfonso Daniel Rodríguez Castelao para fortalecer o nacionalismo galego, nun acto de homenaxe que celebra anualmente na localidade de Rianxo.
Pontón indicou, segundo un comunicado desa formación, que o BNG como "herdeira dun pensamento e unha tradición política máis necesaria que nunca", reclama ante os actuais "tempos convulsos e confusos" un reforzo do nacionalismo galego.
"Se algunha nación sen Estado precisa dun forte movemento nacionalista, esa é Galicia", dixo a líder desa formación política.
Nese sentido, instou, de cara á XVI asemblea nacional desa formación convocada para marzo próximo, a "fortalecer o músculo" do BNG "como alternativa de futuro para darlle esperanza á maioría social desmontando un sistema inxusto".
Afirmou que o BNG ten "un modelo real de cambio" que o mostra nos municipios nos que goberna e que cualificou como "exemplos do bo facer, de alternativa para o benestar das persoas, fronte a un réxime que está esgotado e é incapaz de garantir emprego digno e calidade de vida".
Por iso, avogou por "rescatar a Galicia e aos galegos fronte aos que nos queren conducir á irrelevancia, impoñendo un modelo que nos conduce a ser cada vez menos e cada vez máis vellos", afirmou.
