O Parlamento de Galicia rexeitou este martes, cos votos do grupo maioritario (PPdeG), a proposta de cesamento da Valedora do Pobo, Milagros Otero, pola intercesión arbitraria que, segundo o Tribunal Superior de Xustiza de Galicia (TSXG), levou a cabo para adxudicar unha praza pública a unha candidata en concreto vinculada con este mesmo partido.
Na votación, que abriu esta sesión plenaria do Parlamento galego, os grupos da oposición reiteraron a súa petición unánime de destitución, que non foi atendida pola bancada popular ao entender, en palabras da súa deputada Paula Prado, que para adoptar unha decisión firme a este respecto necesitan dunha sentenza igualmente firme.
Otero compareceu a semana pasada ante a comisión de peticións do Lexislativo galego, onde insistiu na súa decisión de non dimitir e recorrer a sentenza do máximo tribunal autonómico, á que interporá proximamente un recurso de casación, segundo se deriva das alegacións que este luns achegou á Cámara con motivo do debate sobre o seu cesamento.
De acordo co que estipula dita sentenza, a responsable do Alto Comisionado parlamentario actuou con "arbitrariedade" e "desviación de poder" para beneficiar no proceso de adxudicación dunha praza de libre designación como xefa de persoal desta institución a María Puy Fraga, irmá do actual portavoz parlamentario do PPdeG.
A pesar diso, os populares galegos fixeron súas as explicacións da Valedora dos últimos días e sinalaron que a sentenza obvia un documento que establece que os criterios para avaliar os méritos desta praza son previos á convocatoria da mesma.
Para Paula Prado, Otero cumpriu coas súas obrigacións durante o tempo que estivo no cargo e mesmo cesou "de forma case inmediata á adxudicataria da praza en conflito en menos de 48 horas".
Por este motivo, dixo non entender parte das críticas da oposición, á que acusou de non saber encaixar as críticas que esta institución fixo das Administracións onde gobernan e de dar, no caso de En Marea, "un paso máis na súa carreira de destrución das institucións".
A representante do PPdeG admitiu que, analizada a documentación, pódense cometer por parte da defensoría "erros" na redacción do expediente administrativo ou na estratexia da defensa, pero que, en calquera caso, non hai lugar ás acusacións de "desvío de poder" nin de concurso público deseñado ad hoc que se extraen da sentenza do TSXG.
Con todo, esta intervención diferenciouse de forma notable do ton marcado polo conxunto da oposición, que non titubeou á hora de reclamar o cesamento de Otero tras a emisión da devandita sentenza.
O portavoz de En Marea, Luís Villares, apuntou que o PP se retrata con esta votación na que escolle estar "coa corrupción e co enchufismo ou cos dereitos fundamentais e a democracia".
"Galicia non se merece pasar este bochorno e vivir esta vergoña", sostivo Villares, que se referiu ao caso da Valedora como "un asunto de colocación clientelar nun posto institucional" e que elevou o debate á categoría do "máis importante" en canto a corrupción política do que vai de lexislatura.
Patricia Vilán, do PSdeG, instou a Otero a dimitir despois de que o seu grupo retiráselle este martes a confianza a partir da que conseguiu a maioría cualificada que necesitaba para obter o cargo e da que xa non dispón.
No entanto, afirmou que a Valedora "vive nunha realidade virtual" e non asume este feito, nin tampouco que elaborou un "traxe a medida" para que a súa candidata fose seleccionada.
Finalmente, o parlamentario do BNG Xosé Luís Rivas Mini lamentou que unha institución como o Alto Comisionado parlamentario deixouse manipular polo "vello e rancio sistema caciquil que encarna e abandera o PP" e que atopa un caso similar na recente anulación dun concurso público de 69 prazas na Deputación Provincial de Ourense.
Rivas lembrou que o seu partido xa cuestionou a designación de Otero como Valedora, posto que "traía o aval dunha traxectoria de compromiso público co PP e coa dereita rancia" que quedou comprobada "na súa mesma acción á fronte da defensoría", opinou.
