Un 24,8% da poboación galega é obesa, un índice un punto superior á media española, unha situación que se acentuou como consecuencia do confinamento e as restricións á mobilidade derivadas da pandemia do covid-19, advertiu a Sociedade española de Cirurxía da Obesidade (Seco) preocupada por esa situación
"Estamos moi preocupados polo incremento da prevalencia da obesidade, en especial da da obesidade moi grave", dixo a presidenta da Seco, Raquel Sánchez, xefa do servizo de cirurxía xeral e dixestiva da área sanitaria de Vigo.
Segundo cálculos da Seco esa situación xerou un incremento de peso de catro e cinco quilos na maioría das persoas, o que "vai ter consecuencias fatais na saúde futura da poboación", indica nun comunicado remitido polo Sergas, o órgano que xestiona a saúde pública en Galicia.
Para tratar de evitalo, o Sergas e varias sociedades científicas desenvolverán unha estratexia conxunta para abordar de xeito integral este problema, atendendo á prevención, o diagnóstico e o tratamento desta enfermidade.
A cirurxía bariátrica consiste en reducir a capacidade do estómago do paciente e con ela a inxesta de comida
Así o acordaron nunha reunión a propia Sánchez, que actuou en representación doutras catro sociedades nacionais relacionadas con esta patoloxía, e o conselleiro de Sanidade, Julio García Comesaña, en vésperas do Día Nacional da Obesidade, que se celebra mañá, xoves.
Entre as medidas que se tomarán inclúense programas de concienciación orientados á poboación xeral, programas de detección precoz, vías rápidas de atención a pacientes con obesidade moi grave ou optimización dos circuítos hospitalarios en cirurxía bariátrica, un tipo de intervención que se viu retardada durante a pandemia para dar prioridade aos pacientes oncolóxicos.
A cirurxía bariátrica consiste en reducir a capacidade do estómago do paciente e con ela a inxesta de comida, á vez que se realiza unha modificación no intestino para diminuír a absorción de alimentos.
Trátase dun tipo de intervención para pacientes con obesidade mórbida e un peso de entre 120 e 190 quilos, a cal afecta a un 1,6 por cento da poboación.
O Sergas sinala que se trata dunha operación complexa, de modo que se establecen rigorosos criterios para a selección de pacientes
"A terapia conservadora, réximes, dietas alimenticias e tratamentos farmacolóxicos fracasa a longo prazo en practicamente o cento por cento dos pacientes polo que, que a actualidade, a cirurxía bariátrica é o único medio efectivo para conseguir un control de peso a longo prazo", sinala Sánchez.
Engade que en 2020 na área sanitaria de Vigo levaron a cabo 93 intervencións deste tipo e precisa que iso permite reducir ata 78 % o índice de masa corporal o primeiro ano inmediatamente posterior á operación.
O sobrepeso leva aparellados unha serie de graves problemas de saúde como diabetes, hipertensión arterial, insuficiencia coronaria, síndrome de apnea do soño ou alteracións articulares, de aí a importancia de atallalo canto antes.
O Sergas sinala que se trata dunha operación complexa, de modo que se establecen rigorosos criterios para a selección de pacientes, como o seu estado físico ou psíquico, o seu nivel de comprensión e o seu compromiso de colaborar no seguimento posterior, xa que tras a intervención han de levar uns hábitos de vida moi saudables.
