O presidente de Renfe, Isaías Táboas, prevé que "a mediados de xuño" estean xa repostos "todos os servizos Alvia que había entre Madrid e Galicia" na etapa precovid, de modo que a oferta volva ao nivel do ano 2019.
O primeiro paso será que esta mesma liña incorpore o vindeiro luns 7 de xuño outras 10 circulacións semanais -pasará de 56 a 66-, coas que estes servizos ferroviarios alcanzarán o 67,3 por cento do total que había antes da pandemia. A isto hai que sumar que o 14 de xuño incorporarase un servizo diario adicional.
Unha vez recuperada a oferta sobre os niveis precovid, o presidente de Renfe garantiu que se vai a manter, aínda que "lamentablemente aínda non se espera que a demanda por parte dos usuarios volva ser a mesma.
Todo iso avanzouno Táboas nunha comparecencia ante os medios na estación de ferrocarril de Santiago de Compostela, onde este venres asinou co vicepresidente primeiro e conselleiro de Turismo da Xunta, Alfonso Rueda, o convenio para volver pór en marcha este verán os trens turísticos.
"Renfe ten un compromiso con Galicia e ganas de cumprir con Galicia"
"MÁIS OPORTUNIDADES". Para o presidente de Renfe, a recuperación deste servizo e a equiparación dos traxectos cos que había antes da crise sanitaria permitirá contribuír "a que a xente poida vir a Galicia" nun ano Xacobeo, o que dará "máis oportunidades" a sectores como o turístico e o comercio.
"Renfe ten un compromiso con Galicia e ganas de cumprir con Galicia", recalcou, para seguidamente avanzar que a previsión é "incrementar a oferta" cando a AVE estea operativo, ao redor de decembro.
A partir de entón, agregou o presidente, os tempos de viaxe serán "moi competitivos", xa que "o gran mercado emisor" de turistas que é Madrid estará a dúas horas e media de Ourense, a tres horas e cuarto de Santiago e a catro horas da Coruña e Vigo.
"Polo tanto, se este ano Xacobeo 21-22 é bo, o seguinte terá que ser aínda mellor", recalcou.
