Catro tripulantes dunha embarcación de recreo foron rescatados na mañá deste sábado tras afundirse a súa lancha en Porto do Son, segundo informou o servizo de urxencias 112 Galicia.
Foi sobre as 10.30 horas cando un particular comunicou ao 112 que acababa de rescatar coa súa embarcación a catro persoas que estaban na auga.
Dous dos tripulantes, con síntomas de hipotermia, tiveron que ser atendidos polos servizos sanitarios á súa chegada a porto e foron trasladados en ambulancia ao hospital do Barbanza.
O servizo de urxencias 112 alertou a Salvamento Marítimo e ao persoal do Servizo de Gardacostas de Galicia, así como á Garda Civil e a Protección Civil da localidade.