A roza que a empresa pública Seaga prevé acometer nunhas 16.000 hectáreas de franxas de seguridade contra os incendios forestais (aquelas situadas en 50 metros ao redor de vivendas e núcleos de poboación) segue sen data de materialización, cando se cumpre un ano da vaga de incendios forestais que arrasou case 50.000 hectáreas e que provocou catro mortes en Galicia.
A Xunta e a Federación Galega de Municipios e Provincias selaron o acordo en agosto e os concellos tiveron un mes para adherirse voluntariamente despois da publicación do convenio no Diario Oficial de Galicia (DOG).
De acordo cos datos que traslada a Europa Press o presidente da Fegamp, Alfredo García, "ían case 200" a comezos de semana e está previsto que a comisión de seguimento se reúna a próxima para comezar a baremar os riscos, o que determinará as zonas polas que se empeza.
Así as cousas, o sistema non estará listo para que os traballos sobre o terreo –roza e eliminación de piñeiros, eucaliptos e acacias– comecen, de decidirse así, até ben avanzado o mes de outubro ou unha vez entrado novembro, o que necesariamente implicaría que a biomasa volvese a crecer na primavera.
A vaga de incendios forestais arrasou case 50.000 hectáreas e provocou s morte de catro persoas
"MEDIDAS MOI IMPORTANTES". Respecto diso, o director xeral de Ordenación Forestal, Tomás Fernández-Couto, concreta, en declaracións a Europa Press, que a idea é que as tarefas dean inicio este ano, o cal, subliña, "non quita a obrigación" de particulares e consistorios neste ámbito.
Na actualidade, advirte, "tenden a darse condicións extremas como as do ano pasado e é moi importante que todo o mundo se conciencie das súas obrigacións".
No seu balance un ano despois da "situación dramática" vivida hai 12 meses, o responsable da política contra o lume da Xunta reivindica que se tomaron "unha serie de medidas moi importantes", entre as que menciona que se alargase o período de alto risco e o "endurecemento" do seguimento da obrigación de manter limpas as franxas.
Fernández-Couto: Tenden a darse condicións extremas como as do ano pasado e é moi importante que todo o mundo se conciencie das súas obrigacións
"NA FASE ADMINISTRATIVA". "Aínda estamos na fase administrativa", advirte Alfredo García, quen incide en que "a maquina administrativa é moi lenta". Ademais, o tamén alcalde do Barco de Valdeorras avisa de que a limpeza das franxas secundarias "non implica que non haxa incendios".
"Cando cheguemos a ter todo limpo, que tampouco será o ano que vén, reduciriamos o risco para as poboacións, pero non deixará de haber lumes mentres non se organice o monte e se busquen alternativas para que non estea abandonado", sostén.
Neste contexto, o rexedor entende que Galicia está "máis ou menos igual" un ano despois, e que se ardeu menos superficie que en 2017 é porque "non se están dando as circunstancias do ano pasado" en canto a humidade, temperaturas e ventos.
"NAS MESMAS". Na mesma liña, o presidente da Sociedade Galega de Historia Natural, Serafín González, en declaracións a Europa Press, alerta de que a comunidade "volve estar nas mesmas" ante a problemática dos incendios. "Seguimos igual, esperando a que chova", resume, en alusión ás precipitacións que chegaron o xoves e ás que tamén se agarraba o responsable da Fegamp.
Para Serafín González, presidente da Sociedade Galega de Historia Natural, a medida da roza 'non é economicamente viable nin mesmo ecoloxicamente desexable'
De feito, para Serafín González, biólogo e investigador do CSIC, a medida que máis repercusión tivo das anunciadas pola Xunta após a vaga de incendios, a da roza ao redor de casas, "non é economicamente viable nin mesmo ecoloxicamente desexable", posto que supón limpar "practicamente o 5% da superficie de Galicia todos os anos".
"Fíxose algunha campaña de sensibilización sobre os custos económicos e humanos dos incendios? Non", asevera o presidente da Sociedade de Historia Natural, quen, ano tras ano, critica que o Goberno galego dedique "cada vez" un orzamento "maior" para extinción, sen atallar o problema "de raíz".
Outra das cuestións que non se cansa de lamentar é que os medios de comunicación se fagan eco dos lumes, sobre todo, cando están "preto de casas" e na franxa litoral máis poboada, a diferenza do que ocorre cos incendios que calcinan lugares de interese natural como a Ribeira Sacra, o Xurés, os Ancares e o Courel, por exemplo. Desde o punto de vista ambiental e a medio-longo prazo, é "máis preocupante", segundo subliña.
Sobre as chamas que se propagaron os días pasados por distintos puntos do país, explica que en boa parte débense a queimas agrícolas e gandeiras, nun momento no que as colleitas xa están recollidas e sopra vento do noroeste.
O que determina que haxa unha onda ou non, chama a atención, é "o número de días consecutivos sen chover", por iso é polo que constate que "está a arder menos que o ano pasado, pero máis do que sería desexable".
En Carballeda de Avia (Ourense), un dos primeiros concellos en adherirse ao convenio para a roza por parte de Seaga, o seu alcalde, Luís Milia (PSOE), lamenta que "aínda" non se formase a comisión paritaria.
Ademais, considera "unha tolemia" que a limpeza de franxas secundarias dependa subsidiariamente dos concellos, que "non poden nin teñen capacidade económica". "Coa comisión sen reunirse, temos dúbidas de que este ano se poida facer algo como consecuencia do atraso neste acordo", engade o alcalde de Ponteareas, Xosé Represas (BNG).
E é que o rexedor nacionalista opina que o acordo para rozar "púxose en marcha tarde", coa publicación no DOG para acollerse en agosto. Con todo, aínda que cre que "tardará en dar os seus resultados" espera que funcione.
No tocante a esta cuestión o alcalde de Nigrán, Juan González (PSOE), defende a necesidade de "cambiar un pouco a dinámica e as especies que rodean aos núcleos", pero ve "pouco acertado" este "ataque á árbore como culpable de que haxa incendios". "Eu creo os incendios non se orixinan porque haxa árbores", sentenza, mentres chama a "non caer no alarmismo", pois "por si sós non prenden lume".
Nesta liña, o rexedor das Neves, Xosé Manuel Rodríguez Méndez (BNG), móstrase en "franco desacordo" coas atribucións aos concellos de obrigacións subsidiarias de actuar en franxas de seguridade, pois cre que tería que ser a propia Consellería de Medio Rural a que asuma "permanentemente" esta tarefa "con medios e capacidade técnica para poder actuar".
