O conselleiro de Sanidade, Jesús Vázquez Almuiña, aconsellou este venres manter certo "illamento social" para evitar os contaxios por coronavirus, que xa afecta a 85 persoas confirmadas en Galicia fronte aos 64 deste xoves á noite, segundo as análises realizadas polo servizo galego de Saúde.
Tras unha visita á Xefatura Territorial de Sanidade na Coruña para o seguimento do dispositivo de vixilancia epidemiolóxica, Vázquez Almuiña atendeu aos medios de comunicación para trasladar que "o máis importante neste momento é tratar de evitar contacto continuado con grandes masas de persoas".
Dos afectados, cinco atópanse na Uci e a maioría, "unha porcentaxe moi importante" están baixo tratamento no seu domicilio, é dicir, son pacientes leves.
Aínda que non concretou os casos por áreas, dixo que "a área da Coruña é a que ten unha incidencia maior", pero engadiu que "baixou a proporción" nesta zona desde que comezaron os casos na comunidade.
A maioría dos contaxiados están baixo tratamento no seu domicilio, é dicir, son pacientes leves
Acompañado da xefa territorial da área da Coruña, Cristina Pérez, e o xefe de Alertas Epidemiolóxicas da Xefatura Territorial coruñesa, Manuel del Valle, Vázquez Almuiña detallou que Galicia atópase nunha "fase fundamental da epidemia", a diagnóstica, na que "hai facer un diagnóstico precoz e estudar os contaxios".
Respecto ao material nos centros sanitarios, o conselleiro anunciou que hai unha colaboración co País Vasco para a compra de máscaras, pola que chegarán a Galicia un total de 70.000.
Así mesmo, avanzou que colocarase nos próximos días "un cristal protección" nos mostradores dos centros de saúde, xa que "o risco maior son os profesionais sanitarios", e recomendou para todos os trámites administrativos "unha barreira de dous metros" e un límite de quince minutos.
O teléfono gratuíto 900 400 116 é o número exclusivo para a atención ao coronavirus. O 061 mantense para atender urxencias
"Estamos a preparar as accións en caso de aumento de epidemia co reforzo do 061 e dos servizos de urxencias", sostivo o conselleiro, que sinalou que haberá equipamentos novos, reforzaranse as camas e as Uci.
Preguntado polas eleccións, o titular de Sanidade só quixo dicir que "os cálculos falan de que o pico pode estar ao redor da primeira e segunda semana de abril", polo que se prevé que a semana dos comicios ou a anterior haxa situacións complexas" con xente ingresada ou que non poida saír das súas vivendas.
En canto á saturación dos teléfonos facilitados polo Sergas, aconsellou, nalgúns casos, acceder á web da Consellería de chamar, xa que a información facilitada nela pode aclarar a situación na que se atopa o afectado.
Neste contexto, a Consellería de Sanidade solicitou o uso responsable do teléfono gratuíto 900 400 116 como número exclusivo para a atención ao coronavirus, xa que o 061 mantense como exclusivo para atender as urxencias e urxencias sanitarias de Galicia.
"Estamos case triplicando as chamadas dos días de gripe que houbo máis chamadas", advertiu o conselleiro en relación ao 061, e insistiu en que "a proba non é efectiva cando non hai síntomas".
Sobre a posible cancelación do 5-A, Almuiña explicou que prevese que a semana dos comicios ou a anterior haxa situacións complexas" con xente ingresada ou que non poida saír das súas vivendas
Así, puxo en valor a "resposta rápida" que está a dar o Sergas, facendo as probas "nun ou dous" días e destacou que as sete áreas sanitarias fan a extracción e a análise nos laboratorios.
No entanto, enviou un mensaxe de "tranquilidade", pois afirmou que Galicia ten "medios" para facer fronte á crise do coronavirus co actual "labor diagnóstica preventiva".
Neste sentido, tamén pediu a colaboración de todos os cidadáns para "facer que a curva sexa máis plana e afecte de forma máis progresiva á cidadanía", en alusión a importancia de que non se dean todos os contagios á vez para non colapsar os servizos sanitarios.
Sanidade destaca a importancia de que non se dean todos os contagios á vez para non colapsar os servizos sanitarios
"Segue sendo importante o diagnóstico pero tamén o illamento social, non total, pero é moi importante tratar de evitar as grandes concentracións", destacou Vázquez Almuiña, que indicou que "mellor espazos abertos que pechados".
En caso de síntomas, engadiu, é recomendable "quedar en casa" e en relación aos nenos dixo que "os espazos abertos seguen sendo prioritarios", pois é "mellor un parque que un centro comercial" e preferible "un parque con poucos nenos".
Aos estudantes que regresan de zonas de maior risco como Madrid ou o País Vasco, recomendoulles quedar en casa durante catorce días.
