A Dirección Provincial do Servizo Público de Emprego Estatal (SEPE) de Lugo iniciará este venres o traslado á súa nova sede, situada nun local de 1.248 metros cadrados acondicionado na rúa Novo Freire, que estará plenamente operativa o vindeiro martes -día 6 de maio-.
Segundo informou a Subdelegación do Goberno en Lugo, o traslado a esta nova sede en propiedade permitiralle ao Estado aforrar a cantidade que estaba a pagar mensualmente polo aluguer do local no que o SEPE veu funcionando nos últimos anos, na Rolda da Muralla.
O traslado á nova sede non implicará ningún cambio no cadro de persoal, que seguirá baixo a dirección da chantadina María José Gómez González.
Como consecuencia do traslado, as oficinas do SEPE permanecerán pechadas ao público os días 2 e 5 deste mes.
