Mondoñedo, Arteixo, Noia, Marín, Tomiño e O Carballiño miran ao ceo esperando que a meteoroloxía non lles augue a proba piloto das verbenas programada para este sábado. Unha comprobación de protocolos anticovid que, pola súa banda, non terá concentracións de protesta por parte da Asociación de Servizos e Festas de Galicia (Serfega), que as desconvocou despois de que a Xunta accedese a diferentes "peticións" da entidade, como a instalación de bares ou a posibilidade de que xente sen entrada poida gozar dela no caso de que non se cubra o aforamento.
Nunha nota, Serfega explicou que a anulación destas protestas débese a que o secretario xeral de Política Lingüística, Valentín García, "se comprometeu" a que se autoricen cinco das reclamacións da asociación. No que se refire a infraestruturas e servizos, asegurou que se consegue a "concesión de permiso para colocar carpas" que ofrezan un teito pero non estean "pechadas polos laterais", así como a "instalación de bares no lugar de realización das verbenas, sempre segundo o disposto e xa publicado pola Consellería de Sanidade no protocolo de espectáculos ao aire libre".
Para acceder sen entrada debe existir aforamento dispoñible
En canto á asistencia, indicou que a Administración autonómica permitirá o acceso de público "a pesar de non ter entradas por non afluencia de persoas que tiñan reserva previa desa entrada, sempre e cando non estea cuberto o aforamento e unha vez iniciada a verbena". E tamén promete "estudar", engadiu, a petición de que "nun evento de menos de 500 persoas non sexa obrigatorio a toma de datos persoais".
O quinto punto refírese a un acordo para unha reunión coa Vicepresidencia Primeira da Xunta e o conselleiro de Sanidade.
CONDICIONES DA PROBA. Polo momento, a proba piloto das verbenas conta con indicacións específicas. Así, aínda que a Xunta ten dous protocolos que permitirán un máximo de 5.000 e de 10.000 persoas, segundo o formato e a incidencia do covid, este sábado hai un aforamento limitado e controlado, previa adquisición de invitacións, de 1.000. Os asistentes deben facilitar o seu DNI e número de teléfono para contactar en caso de gromo. En Mondoñedo, ademais, accédese con código QR.
Os seis espectáculos comezarán ás 21.00 horas e terminarán ás 23.00. Os asistentes, de pé e con máscara, só poderán interactuar coa súa burbulla de convivencia. E non estará permitido beber ou comer, aínda que en Mondoñedo hai espazos independentes para iso, bares —con consumo sentado— e ata atraccións de feira.
