O bebé que inxeriu haxix xa está cunha familia de acollida despois de que este luns recibise o alta no Hula. O xulgado non atendeu o recurso da nai, polo que a Fiscalía nin se chegou a pronunciar sobre o asunto.
O menor, de 16 meses, levaba desde o pasado martes ingresado, aínda que o seu estado de saúde, desde hai uns días, xa era bo.
Segundo explicaba o domingo o avogado da nai, Javier Latorre, a decisión da xuíza de retirar a custodia sen investigar a fondo as circunstancias persoais do neno e da súa nai é "desproporcionada", e sobre todo sen pedir un informe á Fiscalía.
O letrado indicaba no seu recurso que a nai non consome drogas e que se ocupa con total dedicación do pequeno. A pesar da decisión do xulgado de restrinxir as visitas no Hula, os servizos sociais preferiron permitir que a nai estivese as 24 horas do día á beira do bebé mentres estivo hospitalizado na Pediatría.
ANALÍTICAS. A intoxicación por haxix detectouse nas análises que lle realizaron ao pequeno o pasado martes pola mañá no Hula, onde chegou derivado do Punto de Atención Continuada de Vilalba. Á parte desa primeira analítica, enviáronse mostras de ouriños ao servizo de Toxicoloxía "co fin de concretar o nivel de toxicidade, se fose posible" e para precisar se a intoxicación se produciu "por impregnación ou por inxesta directa", segundo a información facilitada polo Tribunal Superior Xustiza de Galicia.
Á súa vez, "acordouse" realizar "análise de cabelo do bebé para determinar se houbo consumo continuado no tempo". Os resultados que arroxe esta última proba servirán "para constatar se existe facilitación directa ou se trata de inxesta accidental", indica o TSXG.
A nai do bebé non se explica como puido producirse o contacto do pequeno con esta sustancia. A súa única sospeita é que o neno puidera atopar algo e levalo á boca a tarde anterior aos feitos, mentres estaban a tomar algo cun grupo de amigos nunha terraza de Vilalba.
Varias horas despois, ao espertar cara ás 6 da madrugada do martes, cando lle ía a dar o biberón da mañá como cada día, tivo espasmos e perdeu por momentos a consciencia, uns síntomas que recordaban aos dun ataque epiléptico.
O médico do centro de saúde administroulle unha pequena dose de Valium e pediu unha ambulancia para que o trasladasen de urxencia ao Hula.
