A ministra de Transportes, Mobilidade e Axenda Urbana, Raquel Sánchez, asegurou este mércores que o traspaso da titularidade da autoestrada AP-9 a Galicia "ten difícil encaixe" no actual marco de bonificacións que asume o Executivo central, que con todo busca "corrixir os desequilibrios territoriais".
"Hai poucos meses aprobamos un conxunto de bonificacións históricas para a AP-9, que supoñen un esforzo moi importante a cargo dos Orzamentos Xerais do Estado", sinalou a ministra, que manifestou que proceder a unha transferencia da titularidade desa autoestrada "parecería que ten difícil encaixe" coa decisión de establecer bonificacións.
Sánchez, que participou este mércores en Santiago de Compostela na firma de dous convenios de vivenda en Galicia para áreas de rexeneración e renovación urbana e rural, sinalou respecto de posteriores bonificacións que se poidan producir noutras vías, que traballan para "ir corrixindo eses desequilibrios territoriais" que se foron producindo "por decisións adoptadas por gobernos anteriores".
Segundo dixo, outros gobernos prorrogaron concesións a autoestradas que "non estaban xustificadas" e que xeraron "impactos negativos".
"O que estamos a intentar facer, na medida na que temos posibilidades e na medida que tamén van chegando os prazos de finalización de concesión desas autoestradas, é recuperalas, pero naquelas que non podemos recuperar, procedemos a aplicar as bonificacións", declarou.
Preguntada sobre o futuro modelo de financiamento das autoestradas, sinalou que o obxectivo "final" que se marca o ministerio é aplicar unha boa política de modelo de tarificación da rede viaria" e tamén "intentar corrixir eses desaxustes que se produciron pola prórroga de concesión de peaxes".
"Hai que presentar un modelo de tarificación da rede viaria, sobre todo da rede de alta capacidade, que nos permita garantir o mantemento das estradas, cumprir cos obxectivos climáticos e ambientais e que nos permita abordar unha serie de melloras e avanzar na calidade e a seguridade viaria das nosas infraestruturas", puntualizou.
Como exemplo, puxo a outros países da Unión Europea, pois segundo expresou, "25 dos 28 estados membros da UE teñen tarifada a súa rede viaria".
Un modelo que en todo caso "acordarase con todos os sectores implicados, axentes sociais, económicos, as administracións e tamén cos partidos políticos": "é un tema de responsabilidade e un tema de Estado. Todo o mundo entende que se paga polo uso das infraestruturas aéreas, ferroviarias ou marítimas e xa que logo temos que expornos tamén o mesmo modelo para as autoestradas", engadiu.
Neste sentido, Sánchez apelou a acabar cos "desequilibrios territoriais" de cidadáns que dependendo de en que comunidade autónoma vivían pagaban "unhas peaxes moi caras" fronte a outros "que non pagaban nada".
"Estamos comprometidos con ese modelo, pero hai que explicalo e facer pedagoxía. Imos buscar todo o consenso necesario para poder levar a cabo este cambio que vai ser beneficioso para o conxunto da cidadanía", declarou.
PARO DE TRANSPORTE. Un cambio de modelo que tamén terá en conta ao sector dos transportistas, aos que preocupa esta situación e que manteñen, polo momento, unha convocatoria de paros para os días 19, 20, 21 e 22 de decembro.
En relación con este asunto, Sánchez mostrouse confiada de poder chegar a un acordo nos próximos días co sector dos transportistas para así evitar os paros.
O ministerio de Transporte leva xa varios días dialogando co sector, ao que trasladou xa "unha serie de propostas concretas" para dar saída ás reivindicacións do sector, que a ministra cualificou de lóxicas "e xustas".
"Coñecemos o papel fundamental que xogou durante a pandemia e polo tanto somos sensibles ás súas reivindicacións", declarou a ministra, que aínda que non concretou cales son esas propostas si que mencionou que varias delas veñen recollidas no plan Impulsa para a sustentabilidade do transporte de mercancías.
Si se referiu á existencia dalgunhas "cuestións", como as relacións "desiguais" entre os cargadores e os transportistas, unha problemática que segundo Sánchez "transcende o ámbito de competencias" do seu Ministerio.
No entanto, sinalou que ofrecerán a posibilidade de articular "modificacións lexislativas" para protexer a situación e a posición dos transportistas, para que non se dean "relacións abusivas".
Este xoves está prevista unha nova reunión do Ministerio co Comité Nacional de Transportes por Estradas, no que achegarán as súas posicións.
