CXT-Galicia denunciou este venres os plans de Renfe de substituír en decembro o material Talgo do tren hotel entre Galicia e Cataluña por un máis antigo, o que se traducirá en viaxes máis longas e menos confortables para os pasaxeiros.
O sector ferroviario do sindicato critica nun comunicado que Renfe vaia substituír o material Talgo serie VII, con butacas súper reclinables en camarotes de camas gran confort de última xeración, por material da serie VIN, que carece deses estándares de comodidade.
Ademais, vaise a substituír a locomotora por outra deseñada para o transporte de vagóns de mercancías, que é máis potente pero menos veloz.
Esta locomotora carece de xerador eléctrico, o que obrigará ao tren a circular pola liña convencional entre Zaragoza e Barcelona, en lugar de por a vía da AVE, o que aumentará o tempo de viaxe, que actualmente é de quince horas.
Segundo o sindicato, “este empeoramento” do servizo ferroviario convencional entre Galicia e Cataluña segue a estratexia de nbsp;Renfe& de ir degradando a oferta de servizos convencionais de longa distancia en beneficio da alta velocidade para ir eliminando os trens hoteis.
Esta política, continúa o sindicato, vai en contra do que está a suceder noutros países da UE, onde se están aprobando plans de aumento de trens nocturnos como alternativa ecolóxica ao transporte aéreo.