Un incendio deixou practicamente destruído esta mañá un club de alterne na localidade lucense de Taboada, na estrada Nacional 540, aínda que sen provocar danos persoais, segundo informaron a EFE fontes do 112 e dos bombeiros de Chantada, que se ocuparon de extinguir o lume.
A Garda Civil deu aviso do incendio á central de coordinación de urxencias do 112 ao redor das sete e media da mañá e, inmediatamente, foron mobilizados voluntarios de Protección Civil da localidade e os bombeiros de Chantada, que enviaron a unha dotación formada por tres efectivos e dous vehículos.
Cando chegaron ao lugar do incendio, á altura do Alto de San Roque, os bombeiros comprobaron que o lume estaba xa moi estendido e afectaba a toda a parte dianteira da nave, na que funcionaba o club de alterne, aínda que lograron salvar das chamas algúns vehículos que estaban estacionados na zona traseira da construción, dedicada a garaxe e almacén.
O incendio quedou sufocado ao redor das oito e media da mañá.