O incendio declarado en Cervantes na madrugada deste domingo foi extinguido a última hora da xornada, segundo informou a Consellería de Medio Rural. O lume iniciouse ás 01.45 horas na parroquia de Vilaspantes e, segundo as últimas estimacións, arrasou unhas 56 hectáreas.
Nas tarefas de extinción participaron catro axentes forestais, doce brigadas, oito motobombas, tres pas e medios aéreos.
Doutra banda, o incendio iniciado o pasado venres en Carballeda de Valdeorras (Ourense) deuse por extinguido este domingo tras calcinar 137 hectáreas de monte raso.
Ao redor das 20.46 horas do pasado sábado deuse por controlado o último dos focos deste incendio, que chegou a ter ata seis puntos de lume simultáneo. Nas tarefas de extinción traballaron un técnico, 13 axentes, 28 brigadas, tres motobombas e medios aéreos.
Extinguido o incendio de Cervantes tras arrasar unhas 56 hectáreas
O lume iniciouse este domingo de madrugada na parroquia de Vilaspantes ► Extinguido o de Carballeda de Valdeorras tras calcinar 137 hectáreas
