Unhas trinta praias galegas tiñan augas de mala calidade para o baño en 2012 e 2013

Unha trintena de praias galegas, incluídas varias da ría de Ferrol ou a de Samil, en Vigo, tiñan mala calidade das augas para o baño, segundo indica o informe divulgado hoxe pola Axencia europea de medio ambiente sobre os anos 2012 e 2013.

Entre as praias con peor clasificación en canto a calidade das súas augas figuran as da Cabana, Caranza e Barallobre, na ría de Ferrol, ou as de Centroña, Ber, Regueiro e Delicias, na ría de Ares.

Tamén están na lista a praia de Santa Cruz Porto, na ría da Coruña; a de Tupide, en Foz; a da Concha, en Cariño; a de Penoural, en Burela; a Maior, en Malpica de Bergantiños; a de Arnela, en Ponteceso; a da Concha en Cee, na ría de Corcubión, ou a de Testal Taramancos, na ría de Noia.

O informe da Axencia Europea de Medio Ambiente, relativo á calidade das augas nos últimos dous anos, subliña tamén a deficiente calidade de augas na popular praia de Samil e a de Arealonga, en Redondela, ambas as dúas na ría de Vigo; a da Ladeira, en Baiona; e a de Loureiro, en Bueu, e de Laño, na ría de Pontevedra, así como unha decena de puntos en ríos.

O informe indica ademais preto dunha trintena de praias que tiñan unha calidade de auga "suficiente", entre as que figuran a do Portiño, no Grove; a do Ponte da illa da Toxa; e a do Facho, nas súas inmediacións.

Comentarios