O sindicato Unións Agrarias (UU.AA.) instou á Xunta a que "asuma as súas competencias" e non delegue nos tecores e gandeiros o control dos danos do xabaril, que, apuntaron, ascenden a "15 millóns de euros o último ano".
O responsable de Desenvolvemento Rural de UU.AA., Jacobo Feijoo, e o responsable externo, Félix Porto, compareceron o xoves e pediron á Consellería de Medio Ambiente que "reflexione" e instaure "un novo marco de relacións".
Deste xeito, explicaron que se producen ata "tres accidentes diarios de tráfico" e que "catro persoas" resultaron feridas graves polo xabaril no último ano, ademais de que estes animais significan un "risco moi serio" da "chegada da peste porcina africana".
Prodúcense ata "tres accidentes diarios de tráfico" a causa do xabaril segundo Unións Agrarias
A plataforma asegurou que a tendencia "vai a peor" xa que os xabarís están entrando nas cidades e nos espazos naturais protexidos, o que provoca "desequilibrios ecolóxicos", e ademais, agrávase coa "falta de substitución xeracional" dos cazadores.
SOLUCIÓNS. Entre as posibles solucións a este problema, Feijoo sinalou "un censo da poboación" do xabaril, a "caza preventiva" e "o uso da tecnoloxía". Tamén, apuntou que Medio Ambiente non puxo en marcha "o fondo de corresponsabilidade de danos" datado de 2013.
Así mesmo realizaron un chamamento á colaboración dos cazadores para que non apracen a tempada de caza, xa que a colleita de millo aínda está sen recoller, e anunciaron unha Iniciativa Lexislativa Popular para "adaptar a lei á realidade".
A través dun comunicado, os animalistas rexeitaron as propostas do sindicato agrogandeiro para "liberar a caza" e posibilitar que se poida "cribar" a animais silvestres en vedados e franxas de seguridade.
Neste sentido, agardan que se sigan os pasos do Cantón de Xenebra, onde explican que está prohibida a caza desde 1974 e que estableceu unha estratexia de colaboración con agricultores con indemnizacións "áxiles e proporcionais", algo que "non sucede en Galicia".
Ambas as asociacións animalistas prognosticaron que "ninguén" do Parlamento galego asumirá a Iniciativa Lexislativa Popular de UU.AA., xa que o nivel de exactitude dos datos detallado ata o momento "é vago".
Os animalistas van preguntar" á Consellería de Medio Ambiente polo número de xabarís abatidos no período de 2008-2018, ademais de trasladar "á Valedora as súas dúbidas xurídicas sobre a deriva procaza das autoridades".
