Montse L.M., vítima da agresión machista este mércores en Vimianzo, continúa na Uci do Hospital Clínico de Santiago pero este xoves pola tarde retiráronlle a sedación, polo que a súa evolución é boa dentro da gravidade, informan a Efe fontes da investigación.
Montse foi agredida pola súa exparella cun coitelo no pescozo na sede de Unións Agrarias, onde ela traballa, sobre as nove da mañá.
Foi trasladada en estado grave ao Hospital Clínico de Santiago, onde a interviñeron das feridas co temor de que puidesen causar lesións medulares que, en principio, descartáronse.
Aínda que continúa na Uci, está estable e goza dunhas "condicións boas de saúde", subliñou a subdelegada do Goberno na Coruña, Pilar López-Rioboo.
Pola súa banda, o presunto agresor, Javier M., pasou da Uci á planta este xoves pola tarde e a súa evolución é favorable tras ser intervido por unha complicación que derivou nun problema renal, detallan a Efe as mesmas fontes.
Javier deuse á fuga tras agredir a Montse e foi localizado nunha praia de Muros ensanguentado, con cortes nas bonecas que resultaron ser superficiais, e algo somnolento.
A Garda Civil trasladouno detido ao Hospital Virxe da Xunqueira de Cee, onde se lle realizou un recoñecemento médico e decidiuse a súa derivación ao Complexo Hospitalario Universitario da Coruña debido a unha complicación que derivou nun problema renal, polo que ingresou na Uci onde foi intervido aínda que xa está en planta.
