Vigo despide ás vítimas do accidente do tren

Vigo viviu unha fin de semana luctuosa coas despedidas de dous dos falecidos no descarrilamento dun tren no Porriño: o interventor de Renfe Miguel Ángel Veiga, de 56 anos, e o mozo Joaquín Rodríguez, de 23 anos, que se estaba formando como maquinista.

Familiares, amigos e compañeiros ferroviarios quixeron estar no tanatorio Vigo Memorial para acompañalos no seu último adeus, con rostros desencaixados e a ausencia de palabras ante un infortunio destas características.

Joaquín Rodríguez era xogador de balonmán, do AD Carballal, e era fillo do antigo responsable de Transportes de UGT Galicia Cándido Rodríguez, mentres que Miguel Ángel Veiga era lucense, veciño de Vigo, que estaba casado e deixa dous fillos.

Os dous pereceron nesta traxedia ferroviaria, do mesmo xeito que o maquinista, portugués, e un membro da pasaxe, que é americano e faleceu, no seu caso, no hospital ao cal foi trasladado.

O tren que cubría a liña Vigo-O Porto con saída ás 9.02 da cidade galega descarrilou, o pasado venres, ao redor das 9.25 á altura do Porriño.

Renfe informou este domingo de que, nestes momentos, están a desenvolverse os servizos ferroviarios en Galicia con normalidade tras o restablecemento das circulacións deste sábado por parte de Adif ás 13:55 horas.

Durante a xornada deste domingo, vinte e dous son os servizos que pasarán polo Porriño. A primeira hora desta mañá, o tren con saída do Carballiño ás 8:40 horas e chegada a Ourense ás 9:06 horas supuxo o último servizo previsto que se realizou por estrada, salvo cambios de última hora, informa nun comunicado a compañía pública.

Renfe recordou nesta nota, así mesmo, que continúa operativo o teléfono de Atención a Vítimas e Familiares do Accidente do Porriño (900 101 020).