O alcalde de Vigo, Abel Caballero, anunciou que o consistorio local estudará unha eventual redución das taxas que abonan os vendedores ambulantes para darlles así "facilidades", pero "nunha nova dinámica da legalidade". "Nós non expomos as taxas como motivo de recadación, senón como motivo de equilibrio co resto do comercio, que paga impostos", explicou nunha rolda de prensa celebrada este mércores.
Caballero mostrouse convencido de que o Concello rexistrará novas solicitudes de feirantes para montar os seus postos nos mercadillos da cidade, en Bouzas e Coia, "porque se empezarán a dar conta de que hai que cumprir a legalidade". Así, expresou que "algúns non asumiron" este extremo, e abundou en que todos deben "declarar a súa posición de autónomos e teñen que pagar as taxas".
"O non pagar nada produce os efectos que todos sabemos. Ata agora –os vendedores ambulantes– pagaban, a cuestión é a quen pagaban", apostilou o primeiro edil. Unha vez máis, afirmou que "de ningún modo" se tolerará nas feiras de Vigo "a presión" ou "a delincuencia".
Recordou que os mercadiños de Bouzas e Coia foron suspendidos no seu momento "por razóns de seguridade", xa que "tirotear coches foi gravísimo", en alusión ao incidente no que un ambulante do clan xitano dos zamoranos resultou ferido.
Vigo estudará se reduce as taxas a vendedores ambulantes
Caballero asegura que "de ningún modo" se tolerará nas feiras de Vigo "a presión" ou "a delincuencia"
