As visitas ao Pórtico da Gloria renovaranse este 2 de xaneiro, data a partir da que se poderán reservar e adquirir as entradas a través da páxina web www.catedraldesantiago.es nos despachos de billetes do Museo da Catedral.
Así o confirmou a Catedral de Santiago, que recordou que nos últimos meses realizáronse no Pórtico da Gloria diversas labores de conservación preventiva e documentación que están xa na súa fase final.
O acceso a este monumento realizarase en grupos limitados e guiados desde o Museo da Catedral (Pazo de Xelmírez). Pola súa banda, para visitar o Pórtico en horario de acceso gratuíto, a Fundación Catedral habilitou un despacho de billetes específico nos baixos da Casa do Deán (Villar, 3), que atenderá ao público de luns a sábado entre as 19.00 e as 20.00 horas.
A Catedral detallou que cada día se entregarán, por rigorosa orde de chegada e previa acreditación, as invitacións para o día seguinte (e os sábados, as reservadas a composteláns dos domingos pola tarde e as de público xeral dos luns) ata cubrir a cota dispoñible.
En concreto, son 50 entradas diarias, de luns a sábado, para público en xeral; e 100 entradas para composteláns, os domingos pola tarde. Para acreditar a condición de veciño de Santiago de Compostela será necesario que figure o DNI ou achegando certificado de empadroamento se aínda non constase correctamente o domicilio no carné de identidade.
A Catedral tamén informou de que as obras de rehabilitación que se levan a cabo na catedral de cara ao próximo Ano Santo 2021 obrigarán ao peche temporal das visitas ás cubertas a partir do día 2 de xaneiro.
