O Xulgado de Primeira Instancia número 6 de Santiago de Compostela, especializado en Familia, acordou autorizar a subministración da vacina contra a covid-19 a dous internos de residencia, segundo informa o Tribunal Superior de Xustiza de Galicia (TSXG).
Nun dos casos trátase dunha interna nunha residencia cuxa titora se negou a que lle puxesen a vacina e o xuíz indica, na resolución, que estima a solicitude do Ministerio Fiscal "no exclusivo interese da paciente".
Así, sinala que a vacina "evita o risco de contraer a enfermidade e incluso de morrer", á vez que resalta que "permitirá á paciente, unha vez alcanzada a súa inmunidade, gozar dun maior réxime de estancias e comunicación cos seus familiares e achegados".
Desta forma, segundo o xuíz, atenuarase "a grave e continuada separación da contorna máis inmediata que padecen os nosos maiores residentes desde marzo de 2020, con presumible menoscabo do seu benestar emocional".
O mesmo xulgado tamén autorizou a subministración da vacina a un interno nunha residencia que se negou a que lla administrasen.
Neste caso, o maxistrado considera que o consentimento informado por substitución prestado pola entidade tutelar Funga debe ser atendido a pesar da negativa do paciente, pois "carece de capacidade natural actual para comprender o alcance da intervención médica pautada".
No auto explícase que da exploración xudicial do interno na residencia se constate "a total ausencia de capacidade de decisión, en particular en relación á necesidade/conveniencia de que lle sexa administrada a vacina".