O presidente da Xunta, Alberto Núñez Feijóo, ratificou, na rolda de prensa posterior á reunión semanal do seu Executivo, a activación dunha nova liña de axudas por 4 millóns de euros para apoiar aos establecementos de lecer nocturno e minimizar o impacto do seu peche continuado.
En concreto, explicou que os propietarios destes establecementos (discotecas, pubs, cafés-espectáculo, salas de festa, salas de concerto e outros asimilables), poderán percibir axudas desde 7.500 euros ata un máximo de 35.000 euros, en función da superficie do local. Entre o anterior plan, engadiu, e a actual convocatoria de axudas directas, investiranse máis de 8,5 millóns de euros.
En relación á proba piloto realizada o pasado fin de semana en 6 locais de lecer nocturno, Feijóo destacou que transcorreu con normalidade e cun escrupuloso cumprimento das medidas de seguridade, PCR, máscara, distancia de seguridade, circuíto de entrada e saída e medición de CO2.
Ademais, informou da posta a disposición dos donos dos locais dun teléfono para o traslado de incidencias.
A este respecto, tamén concretou que se está completando o estudo da proba para realizar un informe e pechar o protocolo de reapertura, para o que se mantén o horizonte do 1 de xullo.
AXUDAS PARA As EMPRESAS DE CULTIVOS DO MAR. Así mesmo, fronte á pandemia, a Xunta tamén ratificou que as empresas de transformación e cultivo de produtos do mar de Galicia disporán dun total de 7,5 millóns de euros para compensar a caída de ingresos entre o 1 de febreiro e o 31 de decembro de 2020 como consecuencia do coronavirus.
Con estes apoios, cofinanciados co Fondo Europeo Marítimo e da Pesca, a Xunta subvencionará ata o 50% das perdas de facturación rexistradas a condición de que estas sexan de polo menos un 20% en relación cos ingresos medios para o mesmo período nos tres anos anteriores –2017, 2018 e 2019–.
10 MILLóNS PARA As UNIVERSIDADES. Por outra banda, o Executivo autonómico inxectará unha contía de 10 millóns de euros nas tres universidades galegas para que reforcen os seus proxectos de dixitalización e innovación e, deste xeito, continuar coa adaptación ás novas circunstancias e escenarios xurdidos a raíz da pandemia.
Esta nova partida vaise a executar a través de convenios de colaboración específicos entre Consellería de Cultura, Educación e Universidade e cada unha das tres universidades do Sistema Universitario de Galicia (SUG).
O Consello da Xunta deu o visto e prace ao primeiro destes convenios, entre o departamento de Educación do Goberno galego e a Universidade de A Coruña (UDC), por un importe de 2,8 millóns, e nas próximas semanas autorizaranse acordos similares coas outras dúas universidades públicas de Galicia.
