A Xunta confirmou este sábado que o programa Renove Automoción amplía o seu crédito de axudas en 2 millóns de euros, que permitirán chegar a unhas 740 familias galegas máis. Está previsto que a orde se publique no Diario Oficial de Galicia (DOG) o luns 18 de abril.
O programa inclúe a adquisición de vehículos novos cun custo igual ou inferior a 40.000 euros. Previamente, débese dar a baixa de circulación definitiva dun vehículo de polo menos dez anos no caso dos turismos ou de cinco se se trata dunha furgoneta.
As axudas oscilan entre os 3.000 e os 4.000 euros segundo o tipo de vehículo, cantidade que se pode ver incrementada nun 20% para familias numerosas. As solicitudes aceptaranse por orde de chegada.
O plan Renove, convocado no principio do ano cun fondo inicial de 2,5 millóns de euros, beneficiou a 900 familias e empresas ata a data. A ampliación do crédito busca chegar a máis beneficiarios para ofrecer apoio económico na substitución de vehículos de certa antigüidade, xa que o parque automobilístico galego ten unha idade media de 14 anos.
