A Xunta de Galicia publicará neste ano 2021 unha oferta de emprego público cun total de 1.604 prazas en educación, das que máis do 85 % -en concreto 1.372 prazas- serán de novo ingreso.
Así llo transmitiu o director xeral de Centros e Recursos Humanos, Jesús Álvarez Bértolo, ás organizacións sindicais na Mesa Sectorial Docente non Universitaria.
Desta forma, segundo informa a Consellería de Cultura, Educación e Universidade nun comunicado, este departamento autonómico "compromete" un total de 5.498 prazas para educación entre as ofertas de 2020 e 2021. As probas da oferta de 2021 desenvolveranse no ano 2022, dado que neste ano realizaranse as que non se puideron facer en 2020 debido á pandemia.
O director xeral explicou aos sindicatos que está previsto que a oferta de emprego público docente correspondente a 2021 inclúa prazas nos corpos de mestres, profesores de educación secundaria, de escolas oficiais de idiomas, de artes plásticas e deseño.
Así mesmo, abordouse o texto do anteproxecto de decreto polo que se regula a selección, nomeamento e cesamiento das direccións dos centros docentes públicos
Na mesa sectorial celebrada esta mañá tamén se analizou a Orde pola que se convoca concurso de méritos para a selección e o nomeamento da dirección dos centros docentes públicos, a través da que está previsto renovar a dirección de 436 colexios e institutos.
Así mesmo, abordouse o texto do anteproxecto de decreto polo que se regula a selección, nomeamento e cesamiento das direccións dos centros docentes públicos, conforme ás novas especificaciones da Lomloe, indica a Consellería.
Por outra banda, a mesa sectorial continuará este mércores, coa proposta de cambio no calendario escolar para modificar no curso 2021/2022 as datas dos exames de recuperación do alumnado de Educación Secundaria Obrigatoria (ESO), 1º de Bacharelato e 1º de FP Básica e realizalos no mes de xuño.
En concreto, o borrador do calendario escolar do curso 2021/2022 prevé que o alumnado de ESO, Bacharelato e primeiro curso de FP Básica realice as probas de recuperación entre o 17 e o 21 de xuño de 2022. Este curso 2020/2021 aínda non haberá modificacións e desenvolverase seguindo o sistema previsto, precisa Educación.
"O obxectivo deste cambio é, fundamentalmente, beneficiar ao alumnado, que poderá realizar os exames de recuperación cos contidos máis recentes"
"O obxectivo deste cambio é, fundamentalmente, beneficiar ao alumnado, que poderá realizar os exames de recuperación cos contidos máis recentes, con maior posibilidade de aprobar. Así mesmo, isto facilitará a organización do curso seguinte tanto aos docentes, como aos centros e ás familias", recolle o comunicado.
"Con este adianto -engade-, está previsto que o curso 2022/2023 poida iniciarse antes que en anos anteriores en todas as etapas, o que facilitará a conciliación da vida laboral das familias".
