A Xunta iniciou o protocolo para vacinar contra a covid-19 aos tripulantes da flota pesqueira polo que mantén contactos co Instituto Social da Mariña (ISM) para intercambiar datos e organizar a loxística necesaria coa que dar comezo canto antes o proceso.
Segundo explica a Consellería de Mar nunha nota de prensa, estes contactos prodúcense despois de que o Ministerio de Sanidade autorizase o inicio do protocolo necesario para inmunizar aos profesionais do mar e espera que "nos próximos días" deseñe o procedemento a seguir para empezar canto antes.
O Goberno galego sinala que o proceso de vacinación dos mariñeiros debe comezar polas flotas de altura e gran altura e continuar pola de baixura, tendo en conta as especiais características do sector.
En canto á vacina que se lles administrará, aínda que a Xunta propón a Janssen, dunha única dose, a decisión concretarase finalmente durante o deseño da estratexia de vacinación deste colectivo.
O Executivo autonómico lamenta que o Ministerio de Saúde "tardase" en comprender as peculiaridades do traballo no mar, un sector declarado esencial durante a pandemia, e asegura que, pola súa banda, actuou sempre "coa máxima lealdade institucional" respectando os protocolos aprobados nas reunións do Consello Interterritorial de Saúde co resto de comunidades autónomas.