A Xunta pagará ás axencias de colocación privadas por atopar traballo a parados

As axencias de colocación de carácter privado colaborarán a partir do mes de outubro co Servizo Público de Emprego de Galicia.

O Goberno galego pagará ás axencias de colocación entre 200 e 750 euros, en función de distintos parámetros, por atopar traballo aos desempregados galegos.

O presidente da Xunta de Galicia, Alberto Núñez Feijóo, informou este xoves na rolda de prensa posterior ao Consello de que este tipo de colaboración afectará a determinados colectivos.

Poderán acollerse a esta colaboración entre o servizo público e as axencias privadas os beneficiarios do programa Activa ou maiores de 45 anos con máis de dous anos en paro, desempregados entre 26 e 44 anos con menos de seis meses en paro, e perceptores da Risga maiores de 45 anos e con máis de dous anos nas listas de desemprego.

Ademais, poderán acollerse os menores de 25 anos con formación e con menos de seis meses en paro e as persoas de entre 45 e 54 anos con menos de seis meses desempregadas.

A Xunta aboará ás axencias de colocación unha contía por cada contrato obtido, sempre que eses contratos sumen un total de seis meses de traballo nun período de oito meses, ou un ano no caso de traballadores fixos descontinuos.

O Goberno galego destinará 4,9 millóns de euros a esta nova iniciativa.

Actualmente na Comunidade autónoma galega un total de 22 axencias de colocación poderán acceder a este tipo de contratos.

O presidente do Executivo galego tamén anunciou no transcurso da rolda de prensa que o Consello deu o visto e prace a unha nova ampliación dos recursos para atender os beneficiarios da Renda de Inclusión Social de Galicia (Risga) e a axilización dos mecanismos para resolver as solicitudes desta axuda.

Núñez Feijóo indicou que o obxectivo é que a lista de espera de persoas que agardan para percibir a Risga se reduciu a cero a finais do presente ano 2015.

A ampliación de recursos para a Risga contará a finais de ano cun orzamento superior aos 53 millóns de euros, máis de cinco millóns sobre a cantidade prevista ao comezo de 2015 e un 133% máis que en 2009, cando o orzamento era de 22,7 millóns, explicou o presidente.

En canto á axilización dos mecanismos para resolver as solicitudes, Feijóo sostivo que o obxectivo é que todas elas se resolvan e notifiquen nun prazo de 60 días.

Con esta iniciativa, Feijóo dixo que o Goberno galego reforza o seu compromiso coas persoas perceptoras da Renda de Inclusión Social dado que se trata dun colectivo con dificultades.

Durante a rolda de prensa, o responsable autonómico destacou que o pasado ano 2014 se pechou con 12.348 beneficiarios acumulados, un 8,3% máis que en 2013, aínda que por primeira vez se rexistrou un descenso no número de solicitudes presentadas, unha tendencia, expuxo Feijóo, que se consolida no primeiro semestre de 2015, no que existe un descenso do 13% con respecto ao mesmo período do ano precedente.