Un ano máis, a zona portuaria de Pontecesures congregou a centenares de comensais dispostos a gozar coa Festa da Lamprea, un dos acontecementos gastronómicos máis importantes da provincia de Pontevedra. A pesar de que nesta ocasión o número de capturas non foi tan elevado como no de edicións anteriores, a afluencia de público resultou máis que notable, o que serviu para que se despachasen con folgura máis de medio milleiro de racións.
Como xa vén sendo tradición desde mediados da década dos 90, cando se celebrou a primeira edición da festa culinaria cesurá, o pistoletazo de saída á xornada festiva deuno o pregoeiro. Nesta ocasión, o encargado de falar das características da lamprea foi Anxo Angueira. A intervención do actual máximo responsable do Museo Rosalía de Castro, cargo que compatibiliza coas súas responsabilidades como profesor e escritor, deu o pistoletazo de saída a un día no que as condicións meteorolóxicas se aliaron coa organización, xa que o sol e as altas temperaturas axudaron a que na carpa se xerase un gran ambiente.
A decisión do Concello de manter os prezos populares de anteriores edicións (as racións custaban dez euros) resultou todo un acerto. Ademais, a música tamén tivo a súa cota de protagonismo, xa que a velada estivo amenizada polos grupos Xarandeira e Máster.
Os asistentes tiveron ocasión de visitar un acuario no que se expuñan exemplares vivos.
