A Gala da Denominación de Orixe Ribeiro que se celebrou este mércores en San Clodio (Ourense) foi un auténtico festexo con viños novos e o máis selecto da gastronomía de Galicia, todo iso nunha cita na que se congregaron máis de 300 profesionais de todas as áreas do sector.
Así, o colectivo de restaurantes e cociñeiros galegos con Estrela Michelín recolleron o Premio de Honra da Denominación.
Galicia conta actualmente con 12 Restaurantes Estrelas Michelín: Nova, liderado por Julio Sotomayor e Daniel Guzmán (Ourense); A Estación, con Bea Sotelo e Juan Crujeiras (Cambre); O Retiro da Costiña, de Manuel García (Santa Comba); As Garzas, comandado por Fernando "Caco" Agrasar (Barizo-Malpica); Árbore da Veira, de Luis Veira (A Coruña) e Alborada, dirigido por Iván Domínguez (A Coruña).
Tamén Casa Solla, de Pepe Solla (Poio); Yayo Daporta (Cambados); Pepe Vieira Camiño da Serpe, con Xosé Cannas (Poio); Maruja Limón, con Rafa Centeno (Vigo); Culler de Pau, de Javier Olleros (O Grove) e Silabario, con Alberto González (Tui).
O destacado papel que xogan as mulleres foi subliñado coa entrega do primeiro Premio Fusión Muller e Viño a Gemma Vela Humanes, primeira catadora do Hotel Ritz (Madrid) desde 1995. Trátase dunha das primeiras mulleres en exercer este oficio en España e a primeira en tomar ese rol nun hotel de cinco estrelas.
Durante o evento entregáronse os galardóns aos mellores viños do D.O. Ribeiro, designados por un panel profesional de cata de 11 expertos, entre os que se atopaban varios representantes internacionais.
O mellor viño branco de adega é para o viño Ramón do Casar Treixadura 2014 de Adega Ramón do Casar; o mellor viño branco de colleiteiro recae en Canción de Elisa 2014 de Adega Dona Elisa; e o mellor viño tinto é Pazos de Albor do colleiteiro Alfonso Albor Rodríguez.
Como Mellor tarefa de comunicación premiouse a Susie Barrie e Peter Richards, Masters of Wine e presentadores na británica BBC; en Mellor servizo de viño en restaurante destacouse ao Restaurante Esteban, de Mos; o Premio Mellor tenda especializada - vinoteca recaeu no espazo enocultural Vide-Vide, de Santiago de Compostela; e o galardón á Mellor taberna-bar de viños foi para a ourensá Vinoteca Sybaris 2.0.
O Premio Ribeiro ao mellor traballo de investigación elaborado polos alumnos do Instituto Galego do Viño (INGAVI) foi para Historia do Ribeiro, elaborado por Marcos Docasal, Elísabet Castro, Manuel Fernández, Francisco Chao e Alejandro Balseiro.
Ademais, o IES Vilamarín recibiu o seu premio como gañador do concurso de receitas Cociñar con Ribeiro da Feira do Viño do Ribeiro, celebrada en maio deste ano.
