Britney Spears poderá elixir ao seu avogado por primeira vez en 13 anos

A Corte Superior de Los Ángeles permite á cantante elixir letrado, o que supón un cambio substancial na tutela legal que controla a súa vida
Britney Spears. EP
photo_camera Britney Spears. EP

A Corte Superior de Los Ángeles permitiu este mércores que Britney Spears poida elixir ao seu propio avogado, un cambio substancial na tutela legal que controla a súa vida desde fai máis de 13 anos e á que a cantante quere pór fin.

A partir de agora, Britney estará representada por Mathew Rosengart, un avogado que levou casos de celebridades como Sean Penn ou Steven Spielberg e que terá como primeiro obxectivo sacar a Jamie Spears, pai da artista, da tutela.

Desde 2008, Britney estivera representada por Samuel Ingham, un letrado designado pola corte que recentemente solicitou retirarse do caso despois de que o seu labor quedase en dúbida cando a cantante dixo que nunca lle deixou falar en contra da tutela e que tampouco foi informada sobre o seu dereito a pedir a finalización. 

Segundo unha exclusiva do diario The New York Times, este avogado gañaría máis de 3 millóns de dólares desde 2008 e fontes próximas ao caso denunciaron que Ingham foi máis fiel aos intereses do pai que da propia cantante. 

Pero ademais, o feito de que Britney poida contratar ao seu propio representante pon en dúbida a existencia da propia tutela legal, un mecanismo reservado para persoas gravemente incapacitadas e que se supón que non poden facerse cargo de se mesmas.

Así, a decisión da xuíza senta un precedente no caso de Britney que podería trasladarse ao resto do sistema legal que ampara as tutelas, en plena controversia grazas á notoriedade da cantante.

A semana pasada, a nai de Britney, Lynne Spears, solicitou que a súa filla puidese escoller a un avogado: "Agora, e nos últimos anos, a persoa tutelada é capaz de coidar de si mesma e, de feito, dentro dos parámetros da tutela, gañou literalmente millóns de dólares como celebridade internacional", argumentou.

Con todo, o seu pai, Jamie Spears (están divorciados), é quen exerce como titor desde entón e, polo momento, non deu ningún paso para apartarse da tutela ou relaxar algún dos seus aspectos.

Durante a nova audiencia, a propia Britney volveu insistir en que non só quere pór fin á tutela, senón que quere demandar ao seu pai por "abuso".

Centos de manifestantes congregáronse na porta dos Xulgados dos Ángeles reivindicar a liberdade da artista, cuxo caso deu a volta ao mundo tras a súa declaración do 23 de xuño na que asegurou que "non era feliz" e vivía nun réxime de "escravitude".

Comentarios