O conselleiro de Educación e Cultura do Goberno de Ceuta, Javier Celaya Brey (PP) preguntouse no seu perfil de Facebook: "¿E se eu agora mesmo publicamente ofrecese mil euros do meu peto a quen lle parta a cara a Dani Mateo?".
Celaya, que é primo de Mariano Rajoy, realizou este comentario nun fío aberto desta rede social por un xornalista de Ceuta, despois de que o xornalista e actor Dani Mateo, de La Sexta, interpretase o pasado mércores un sketch no que, mentres lía o prospecto dun medicamento antigripal, estornudaba e soábase o nariz coa bandeira de España.
O conselleiro preguntábase que "¿e se eu agora mesmo publicamente ofrecese mil euros do meu peto a quen lle parta a cara a Dani Mateo?, ¿sería liberdade de empresa?, ¿liberdade de expresión?, ¿delito de odio?, ¿aquí tamén cabería englobar desprezar a bandeira de España?". Así mesmo, Celaya engade: "Pregúntoo por se ao final me animo a ofrecer unha recompensa pola cara partida de tan magno bellaco".
Pola súa banda, o secretario xeral do PSOE de Ceuta, Manuel Hernández, solicitou o cesamento de Javier Celaya tras as súas declaracións "incitando a violencia".
Manuel Hernández sinalou nun comunicado que "como conselleiro de Educación, que ten que formar en valores, e ser congruente no seu discurso co que representa, atrévese a dicir algo que tivo un eco a nivel nacional, unha frase tan brutal como agredir a un xornalista".
