O actor estadounidense Shia LaBeouf saíu hoxe en liberdade tras pasar a noite en comisaría logo de ser arrestado por alterar a orde nun teatro de Broadway onde se representaba o musical Cabaret. LaBeouf tiña un aspecto demacrado e desarreglado á saída dun tribunal local, cunha camisa azul sucia e desgarrada ambos os ombreiros, así como botas sen cordóns.
O actor de 28 anos e coñecido pola súa interpretación nas tres películas de Transformers e a cuarta entrega de Indiana Jones, foi detido onte á noite por conduta desordenada no primeiro acto do musical. O persoal de seguridade do teatro pediulle que se marchase, o que rexeitou, a disputa chegou ao físico e acabou cunha chamada á Policía, que asegurou que o actor ameazou ao persoal do teatro e aos axentes.
LaBeouf compareceu hoxe ante un xuíz dun tribunal local, defendido por un avogado de oficio, e foi acusado de entrada ilegal, conduta desordenada e acoso, tras o cal foi posto en liberdade sen fianza coa orde de comparecer o próximo 24 de xullo.
Tras saír do tribunal, o actor dirixiuse a pé a un céntrico hotel neoiorquino, rodeado dunha nube de reporteiros e fotógrafos, aínda que non fixo declaracións.
Varios espectadores do teatro dixeron a medios locais que LaBeouf parecía estar baixo a influencia do alcol ou algunha droga.
O diario sensacionalista New York Post divulgou un vídeo caseiro, gravado supostamente pouco antes do incidente no teatro, no que se lle ve perseguir a un home sen teito para arrebatarlle unha bolsa con comida dunha coñecida cadea de hamburgueserías.
